Sera d’advent 2024
Suenter ina biala arrivada da nos affons cun las latiarnas zambergiadas dad els ha nossa 6avla sera d’advent a Sumvitg entschiet il venderdis, ils 29-11-2024. Ensemen en collaboraziun cun l’uniun da dunnas VINAVON han ils affons uonn puspei gidau nus da SumvitgViva ad embellir quell’occurrenza.
La 6avla Steila da Sumvitg havein nus astgau surdar uonn a Martin Candinas. Era uonn ei la steila el center sco segn da renconuschientscha ed engraziament pigl engaschi dil honorau. In grond engraziel fetg a Martin Candinas per siu engaschi per nus e nossa cuminonza sco era per sia viseta a nossa sera d’advent 2024.
Sera d’advent 2023
Ils 1-12-23 han nos affons dil vitg ed uclauns schau splendurar il plaz Cadruvi en ina mar da glischs. Cun lur latiarnas zambergiadas sez ein els vegnir da vitg en entochen avon baselgia per envidar il temps festiv d’advent. Cun ina biala canzun han els era procurau per ina atmosfera festiva.
Il pigniel da Nadal resplenda uonn buca mo cun las candeilas, mobein era cun las decoraziuns creada dils affons. Mintg’affon ha astgau zambergiar sia atgna rucla. In grond engraziament va all‘uniun da dunnas VINAVON per lur engaschi da organisar e zambergiar cun ils affons las latiarnas e las decoraziuns.
Medemamein lessan nus engraziar allas numerusas visitadras ed als numerus visitaders. La cuminonza viva e las fatschas tarlischontas han fatg che quella sera d’advent ei stada tut speziala.
Steila da Sumvitg 2023
La «Steila da Sumvitg» ei vegnida surdada quei onn al Chor mischedau Sumvitg/Cumpadials. Nus gratulein cordialmein al chor sin quei premi meritau e selegrein gia ussa sin il concert dils 15 e 17 da december 2023 en baselgia da Sumvitg ensemen cun la Societad da musica Sumvitg/Cumpadials.
Sera d’advent 2022
Rodund 80 persunas han assistiu venderdis sera, ils 25-11-2022 alla sera d’Advent sin plaz Cadruvi a Sumvitg ed envidau il pigniel ornaus. Quel vegn uonn provedius cumpleinamein cun energia solara. Ils giavischs ed auguris per in benediu temps d’Advent ha la suprastonza da SumvitgViva surdau en fuorma dil regal simbolic sper il pigniel da Nadal. Quei pachet surdimensiunau cuntegn regals ad in e scadin sco auguris per cletg, engrazieivladad ed convivenza pascheivla ed activa per in e scadin.
Steila da Sumvitg 2022
La steila da Sumvitg ei vegnida surdada uonn allas autoritads communalas e persunas stadas involvidas vid il project da baghegiar habitaziuns en casa da scola. Igl anteriur president communal, Armin Candinas, ha priu encunter quella distincziun. Grazia al project realisau ha nies vitg astgau profitar da novs habitonts e duas familias giuvnas cun affons.
Sera d’advent 2021
Ils 11 da december 2021 havein nus saviu sentupar sil plaz Cadruvi e celebrar suenter in liung temps senza occurenzas la cuminonza. Ei ha fatg grond plascher da veser aschi biaras convischinas e convischins. Nus havein saviu dar ina paterlada e star in mument ensemen. Engraziel fetg per vossa viseta!
Steila da Sumvitg 2021
Era uonn havein nus puspei piclau ora enzatgi che ha zun spezials merets da retscheiver nossa «Steila da Sumvitg».
La Steila da Sumvitg 2021 ei ida a nossa stizun dil vitg. Denton fuss quella stizun nuot sch’ella havess buca in cor. Ed il cor da quella stizun ein nossas mattas dil Volg, ch’ein di per di cheu per nus e miran che nus hagien nies da mintgadi. Nus engraziein a vus, Adelina, Assunta, Renata e Sandra per vies engaschi cun tonta carezia per nossa cuminonza.
Sera d’advent 2019
Steila da Sumvitg 2019
Per la secunda gada ha l’uniun SumvitgViva surdau la «Steila da Sumvitg». Uonn ha la Societad da musica Sumvitg/Cumpadials astgau prender encunter nossa steila.
Nus giavischein ad els proxima stad ina biala fiasta da 125 onns.
Sera d’advent, divertiment e cuminonza 2018 a Sumvitg
Venderdis, ils 30 da november 2018 ha Sumvitg Viva envidau in e scadin tier ina sera da divertiment sin plaz Cadruvi a Sumvitg. Suenter cuorts plaids d’introducziun ei il pigniel da Nadal vegnius illuminaus. Sco surpresa dalla sera ei vegniu surdau per l’emprema gada il premi «Steila da Sumvitg». Quella distincziun duei honorar in convischin ni ina convischina per specials merets ni per siu particular caracter. Ina persuna duei semplamein retscheiver in grond dieuspaghi per ses buns survetschs en favur dalla cuminonza.
Steila da Sumvitg 2018
L’ emprema «Steila da Sumvitg 2018» ei vegnida surdada ad Aluis Cathomas (79) per ses nunstunclenteivels merets sco fideivel cavafossa, e luvrer da santeri e sco curteseivel convischin, al qual ils egls tarlischan aschigleiti ch’el entscheiva a raquintar da sia lavur ni da ses hobbys.
Sco finiziun dalla sera ha Erwin Schmid da Laax schau intonar bellezia musica d’advent ord siu orgelet da maun duront che nossas bunas olmas dall’uniun han surviu als presents punsch, vin cauld e piziultas.
Illuminaziun da Nadal sin Plaz Cadruvi a Sumvitg
Ils davos decennis procurava il vischinadi mintgamai ch’il plaz Cadruvi vegni ornaus duront il temps d’Advent cun in pigniel da Nadal illuminaus. SumvitgViva ha surpriu quell’incarica, ch’il vischinadi abolius exequeva. Il comité d’iniziativa cumpletta quella incarica cun ina sentupada denter vischins e hosps ed enramar quella cun producziuns da nossas uniuns culturalas.