Ga dapi igl onn 2018 surdat l’uniun SumvitgViva mintg’onn la «Steila da Sumvitg» a caschun dalla sera d’advent a persunas ni uniuns per lur buns survetschs en favur da nossa cuminonza.
Tgi ha tenor tiu meini medemamein fadigiau ina «Steila da Sumvitg »? S’annunzia cun tias ideas sut info@sumvitgviva.ch.
Steila da Sumvitg 2023
La «Steila da Sumvitg» ei vegnida surdada ils 1 da december 2023 al Chor mischedau Sumvitg/Cumpadials. Nus gratulein cordialmein al chor sin quei premi meritau e selegrein gia ussa sin il concert dils 15 e 17 da december 2023 en baselgia da Sumvitg ensemen cun la Societad da musica Sumvitg/Cumpadials.
Steila da Sumvitg 2022
La steila da Sumvitg ei vegnida surdada il 2022 allas autoritads communalas e persunas stadas involvidas vid il project da baghegiar habitaziuns en casa da scola. Igl anteriur president communal, Armin Candinas, ha priu encunter quella distincziun. Grazia al project realisau ha nies vitg astgau profitar da novs habitonts e duas familias giuvnas cun affons.
Steila da Sumvitg 2021
La Steila da Sumvitg 2021 ei ida a nossa stizun dil vitg. Denton fuss quella stizun nuot sch’ella havess buca in cor. Ed il cor da quella stizun ein nossas mattas dil Volg, ch’ein di per di cheu per nus e miran che nus hagien nies da mintgadi. Nus engraziein a vus, Adelina, Assunta, Renata e Sandra per vies engaschi cun tonta carezia per nossa cuminonza.
Steila da Sumvitg 2020
Pervia dalla pandemia da Covid19 ei la fiasta da nies victur dalla Steila da Sumvitg 2019 – la Societad da musica Sumvitg / Cumpadials – vegnida spustada per in onn. SumvitgViva giavischa bia plascher d’organisar il giubileum da «125 + 1 onn Societad da musica Sumvitg / Cumpadials» e selegra gia sin la fiasta la stad 2021.
Steila da Sumvitg 2019
Nossa secunda «Steila da Sumvitg» havein surdau il november 2019 alla Societad da musica Sumvitg/Cumpadials. Els astgan festivar la proxima stad 125 onns. Per siu engaschi cultural per nossa cuminonza engraziein nus fetg alla musica e giavischein ad els proxima stad in bi giubileum da 125 onns.
Steila da Sumvitg 2018
L’ emprema «Steila da Sumvitg 2018» ei vegnida surdada ad Aluis Cathomas (79) per ses nunstunclenteivels merets sco fideivel cavafossa, e luvrer da santeri e sco curteseivel convischin, al qual ils egls tarlischan aschigleiti ch’el entscheiva a raquintar da sia lavur ni da ses hobbys.
