ils 16 da mars 2025
Occurrenza preliminara e radunonza generala
La sonda sera avon nossa radunonza generala havein nus giu la pusseivladad da dar in sguard el luvratori da Florian Cajacob. Cun passiun fuorma el leu dapi in temps tibas – in instrument e mistregn ch’ein quasi i en emblidonza. Cun siu entusiassem ha Florian dau investa a nus en il mund da questa lavur tradiziunala. Nus engraziein cordialmein per la guida e giavischein vinavon bia plascher e bien success cun siu hobi particular.
Suenter havein menau atras nossa 5avla radunonza generala. Denter auter havein nus fixau leu differents termins e sperein, che che in ni l’auter da quels anfla siu plaz en Vossa agenda. Dapli informaziuns tier ils termins s’uondan.
10-5-2025, lavur cumina
17-5-2025, cuors da segar cun la faultsch
12-9-2025, luvratori «discuors dalla sera davos meisa»
28-11-2025, sera d’advent e Steila da Sumvitg 2025
ils 17 da fevrer 2025
Invitaziun alla 5. Radunonza generala da SumvitgViva
Datum e temps:
Sonda, ils 15 da mars 2025 allas 20:00 uras
Liug da radunonza:
Aula scola Sumvitg
Occurrenza preliminara:
Allas 19:00 uras sentupein nus sin plaz Cadruvi
Tractandas
1. Avertura e beinvegni
2. Elecziun d’in dumbravuschs
3. Approbaziun dil protocol dalla radunonza generala dils 23-03-2024
4. Rapport dil president
5. Rendaquen 2024
6. Elecziuns communalas 2025, nominaziuns
7. Program da lavur 2025
8. Orientaziuns e varia
Cordialmein envida
La suprastonza
ils 12 da fevrer 2025
Workshop da sgurgialar
Il luvratori da sgugialiar previus ils 22-03-2025 ha buca liug, damai che la menadra dil cuors ha stuiu dar giu ord motivs persunals. In remplazzament havein nus deplorablamein buca anflau aschi spert.
Nus empruein d’anflar in niev termin e menader dil cuors e s’annunziein alura.
ils 2 da december 2024
6avla Steila da Sumvitg
Suenter ina biala arrivada da nos affons cun las latiarnas zambergiadas dad els ha nossa 6avla sera d’advent a Sumvitg entschiet. Ensemen en collaboraziun cun l’uniun da dunnas VINAVON han ils affons uonn puspei gidau nus da SumvitgViva ad embellir quell’occurrenza.
La 6avla Steila da Sumvitg havein nus astgau surdar uonn a Martin Candinas. Era uonn ei la steila el center sco segn da renconuschientscha ed engraziament pigl engaschi dil honorau. In grond engraziel fetg a Martin Candinas per siu engaschi per nus e nossa cuminonza sco era per sia viseta a nossa sera d’advent 2024.
ils 30 d’october 2024
Sera d’advent
Sco usitau organisescha l’uniun SumvitgViva era uonn la sera d’advent. Secapescha vegn la «Steila da Sumvitg » puspei surdada quella sera sco grond dieuspaghi ad ina persuna ni ad ina uniun per ses buns survetschs en favur dalla cuminonza.
Venderdis, ils 29 da november 2024 allas 19.00 uras sin plaz Cadruvi a Sumvitg cun viseta da Martin Candinas.
Era uonn accumpognan l’uniun da dunnas VINAVON ed ils affons dil vitg noss’occurrenza e procuran per in’atmosfera da Nadal.
Nus selegrein sin vossa viseta!
Cordialmein envida, SumvitgViva
ils 30 d’october 2024
Agenda 2025
Pil proxim temps ha SumvitgViva fixau plirs termins.
Nus sperein che in ni l’auter da quels anfla siu plaz en Vossa agenda.
29-11-2024
Sera d’advent sin plaz Cadruvi a Sumvitg cun viseta da Martin Candinas
15-03-2025
Radunonza generala
22 e 23-03-2025
Workshop da sgugialar (Jodeln) cun Eva Landau e siu quartet e concert final
10-05-2025
Lavur cumina
Dapli informaziuns vegnan publicadas cheu sin nossa pagina d’internet il dretg temps.
ils 25 d’uost 2024
Scargada Naustgel
ils 26 da fenadur 2024
Fiasta d’emprem d’uost per l’entira vischnaunca a Surrein
9.00 uras
Spassegiada culturala entuorn il vitg cun dr. Clau Solèr. Tema: «Cu la roda gira»
Rimnada sin plaz Cadruvi
16.00 uras
Entschatta dalla sera cun ustria e giugs per ils affons
17.00 – 23.00 uras
Las diversas cuschinas sil plaz ein en funcziun. Spisas hodiernas e d’antruras.
Producziun dils Sunatibas Posta Biala
Til cun lampiuns
Plaid da cuss. naz. Martin Candinas
Cordial beinvegni fa:
La vischnaunca da Sumvitg e l’uniun Nies-Surrein
ils 9 da matg 2024
Lavur cumina 2024
Sonda, ils 4 da matg 2024 essan sentupai a bun’ura sin plaz Cadruvi. Nies plazzal da lavur havein nus anflau a Clavadi / Con da Vitg, nua che nus havein giu da dismetter roma, dascha e lenna che sesanflva en la senda da viandar. Plinavon ei vegniu fatg remaduras vid il trutg denter Con da Vitg – Barcuns Dado e Pigniu. 31 persunas da tutta posa e vegliadetgna han priu part a nies di da lavur cumina. Silsuenter essan nus seradunai avon stalla da Sep Benedetg Candinas per gentar e star enzacontas uras da cumpignia. Igl ei puspei stau in bellezia di. Cheu anflas entginas fotis dalla lavur cumina.
Engraziel fetg a tut tgi ch’ei sengaschaus!
ils 19 d’avrel 2024
Lavur cumina
Sonda, ils 4 da matg 2024 envida l’uniun SumvitgViva in e scadin volu
ntari a far lavur cumina.
Nus sentupein allas 8:00 uras sin plaz Cadruvi a Sumvitg. Mintgin duei far aschi bien e prender buns calzers, vons ed uaffens adattai per la lavur sin differentas vias d’uaul.
Suenter la lavur offerescha l’uniun ina grillada.
Sin bien seveser, SumvitgViva
ils 25 da mars 2024
Termins 2024
Caras commembras e cars commembers
A caschun da nossa radunonza generala 2024 havein nus decidiu da far uonn lavur cumina ils 4 da matg 2024.
- Liug da sentupada: Cadruvi Sumvitg
- Uras: 08.00 h
Scrivi quei termin gia uss en vies calender!
Ils 29 da november 2024 ha liug la «Steila da Sumvitg» 2024.
Ina bial’occurrenza per guder il temps en cuminonza ed entscheiver il temps d’advent.
Nus selegrein gia uss sin in onn plein occurrenzas e sinsevesers cun vus.
ils 23 da favrer 2024
4. radunonza generala da SumvitgViva
Datum e temps:
Liug da radunonza:
casa da scola Cumpadials
Occurenza preliminara:
Allas 19.05 uras sentupein nus avon baselgia a Cumpadials.
Nus fagein ina surpresa!
Tractandas
- Avertura e beinvegni
- Elecziun d’in dumbravuschs
- Approbaziun dil protocol dalla radunonza generala dils 25-03-2023
- Rendaquen 2023
- Rapport dil president
- Elecziuns dalla suprastonza, dil president e dil post da revisiun
- Program da lavur 2024
- Orientaziuns e varia
Cordialmein envida la suprastonza
ils 2 da december 2023
Retrospectiva sera d’advent 2023
Ier sera han nos affons dil vitg ed uclauns schau splendurar il plaz Cadruvi en ina mar da glischs. Cun lur latiarnas zambergiadas sez ein els vegnir da vitg en entochen avon baselgia per envidar il temps festiv d’advent. Cun ina biala canzun han els era procurau per ina atmosfera festiva.
Il pigniel da Nadal resplenda uonn buca mo cun las candeilas, mobein era cun las decoraziuns creada dils affons. Mintg’affon ha astgau zambergiar sia atgna rucla. In grond engraziament va all‘uniun da dunnas VINAVON per lur engaschi da organisar e zambergiar cun ils affons las latiarnas e las decoraziuns.
Medemamein lessan nus engraziar allas numerusas visitadras ed als numerus visitaders. La cuminonza viva e las fatschas tarlischontas han fatg che quella sera d’advent ei stada tut speziala.
La «Steila da Sumvitg» ei vegnida surdada quei onn al Chor mischedau Sumvitg/Cumpadials. Nus gratulein cordialmein al chor sin quei premi meritau e selegrein gia ussa sin il concert dils 15 e 17 da december 2023 en baselgia da Sumvitg ensemen cun la Societad da musica Sumvitg/Cumpadials.
Cheu saveis vus aunc inagada guder l’atmosfera festiva e sfegliar en enzaconts maletgs dalla sera d’advent 2023.
Engraziel fetg a tut quels che han gidau ier sera ed han fatg procurau che quei ei in eveniment nunemblideivel.
Nus giavischein a vus uss in bi temps d’advent e bialas fiastas da Nadal.
ils 8 da november 2023
Sera d’advent 2023
Sco usitau organisescha l’uniun SumvitgViva era uonn la sera d’advent. Secapescha vegn la «Steila da Sumvitg » puspei surdada quella sera sco grond dieuspaghi ad ina persuna ni ad ina uniun per ses buns survetschs en favur dalla cuminonza.
Venderdis, igl 1. da december allas 19.00 uras sin plaz Cadruvi a Sumvitg.
Uonn accumpognan l’uniun da dunnas VINAVON ed ils affons dil vitg noss’occurrenza e procuran per in’atmosfera da Nadal.
Nus selegrein sin vossa viseta!
Cordialmein envida, SumvitgViva
ils 15 da zerclaur 2023
Taccaders «Sumvitg»
Nus selegrein da astgar communicar che nus havein puspei taccaders da «Sumvitg»! Mussei che vus essas in ni ina da vitg cun taccar quels taccaders dapertut nua che vus lessas. Sigl auto, sil laptop, sil velo ni si sin vies bloc da notizas, quei taccader sa vegnir montaus quasi dapertut.
Fotis da vies taccader saveis parter ellas medias socialas cun il hashtag #sumvitgviva.
Taccaders san vegnir empustai per mail tier melanie@sumvitgviva.ch.
ils 26 d’avrel 2023
Lavur cumina 2023
La sonda vargada ein rodund 35 commembras e commembers sentupai per far lavur cumina. Suenter la lavur havein nus gudiu in bi suentermiezdi cun grill, bubrondas e buna cumpignia.
Engraziel fetg a tuts per lur grond engaschi.
Cheu anflas entginas fotis dalla lavur cumina.
ils 11 d’avrel 2023
Lavur cumina dall’uniun SumvitgViva
Sonda, ils 22 d’avrel 2023 envida l’uniun SumvitgViva in e scadin voluntari a far lavur cumina. Nus sentupein allas 8:00 uras sin plaz Cadruvi a Sumvitg. Mintgin duei far aschi bien e prender buns calzers, vons ed uaffens adattai per la lavur sin differentas via d’uaul. Suenter la lavur offerescha l’uniun ina grillada communabla.
Sin bien seveser, SumvitgViva
ils 8 da mars 2023
3. radunonza generala da SumvitgViva
Datum e temps:
Sonda, ils 25 da mars 2023 allas 20.00 uras
Liug da radunonza:
aula casa da scola Sumvitg
Occurenza preliminara:
Allas 19.15 uras sentupein nus sin plaz scola.
Ei dat ina pintga surpresa
Tractandas
- Avertura e beinvegni
- Elecziun d’in dumbravuschs
- Approbaziun dil protocol dalla radunonza generala dils 05-03-2022
- Rendaquen 2022
- Rapport dil president
- Elecziun cumplementara d’inA commemberRA pil post da revisiun
- Program da lavur 2023
- Orientaziuns e varia
Cordialmein envida la suprastonza
ils 2 da mars 2023
Cuors da tagliar plontas cun SumvitgViva
Sonda, gl’emprem d’avrel 2023 meina l’uniun SumvitgViva atras in cuors da tagliar plontas cun Sep Benedetg Candinas. Il cuors entscheiva allas 9:15 uras e va entochen ca. las 15:30 uras.
Liug da sentupar: Sper stalla da Sep B. Candinas, Via Cuntrin, Sumvitg.
Il cuors cuntegn teoria e praxis, il tagliar pumera da plontas giuvnas e veglias.
Per commembras e commembers da noss’uniun ei la participaziun gratuita. Per ils ulterius interessai cuosta il cuors 40.00 CHF/persuna.
Annunzias prendin nus bugen encounter entochen ils 25 da mars 2023 sut info@sumvitgviva.ch.
Il diember da participants ei limitaus. Las annunzias vegnan risguardadas tenor retschavida. Gentar dat ei ell’ustria per tgi che less. Segirada ei caussa dils participonts.
Nus selegrein sin vossa participaziun e stein bugen era a disposiziun per ulteriuras damondas.
ils 28 da november 2022
Martin Candinas, president dil cussegl naziunal
Nus gratulein da tut cor a nies commember e convischin da Rabius, Martin Candinas, per sia elecziun sco president dil cussegl naziunal. Martin sesa dapi 11 onns el cussegl naziunal. Malgrad ch’el viva oz cun sia famiglia a Cuera ei Martin adina restaus in da nus. Nus essan loschs da quella gronda elecziun e perschuadi che Martin vegn vinavon a semetter en per mantener las valurs dalla democrazia Svizra e sustener las regiuns da muntogna.
ils 26 da november 2022
Sera d’Advent 2022
Rodund 80 persunas han assistiu venderdis sera, ils 25-11-2022 alla sera d’Advent sin plaz Cadruvi a Sumvitg ed envidau il pigniel ornaus. Quel vegn uonn provedius cumpleinamein cun energia solara. Ils giavischs ed auguris per in benediu temps d’Advent ha la suprastonza da SumvitgViva surdau en fuorma dil regal simbolic sper il pigniel da Nadal. Quei pachet surdimensiunau cuntegn regals ad in e scadin sco auguris per cletg, engrazieivladad ed convivenza pascheivla ed activa per in e scadin.
La steila da Sumvitg ei vegnida surdada uonn allas autoritads communalas e persunas stadas involvidas vid il project da baghegiar habitaziuns en casa da scola. Igl anteriur president communal, Armin Candinas, ha priu encunter quella distincziun. Grazia al project realisau ha nies vitg astgau profitar da novs habitonts e duas familias giuvnas cun affons.
Maletgs dalla sera anflas ti cheu.
ils 29 d’october 2022
Sera d’Advent 2022
Sco usitau organisescha l’uniun SumvitgViva era uonn la sera d’advent. Secapescha vegn la «Steila da Sumvitg 2022» puspei surdada quella sera sco grond dieuspaghi ad ina persuna ni ad ina uniun per ses buns survetschs en favur dalla cuminonza.
Venderdis, ils 25 da november allas 19.00 uras sin plaz Cadruvi a Sumvitg.
Suenter il program sin plaz Cadruvi visitein nus las habitaziuns novas en scola a Sumvitg.
Sin seveser e cordials salids, uniun SumvitgViva
ils 29 da matg 2022
Lavur cumina 2022
Ier da bun‘ura ein enzaconts dels dall‘uniun SumvitgViva serendi encunter Crestas a far lavur cumina. In begl per refrestgentar spassegiont:as ei stau il resultat. Suenter la lavur ha ei dau ina buna grillada. In grond engraziel fetg a tuts gidonters ed a tuttas gidontras.
Cheu anflas entginas fotis dalla lavur cumina.
ils 20 da matg 2022
Lavur cumina dall’uniun SumvitgViva
Sonda, ils 28 da matg 2022 envida l’uniun SumvitgViva in e scadin voluntari a far lavur cumina. Nus sentupein allas 8:00 uras sin plaz Cadruvi a Sumvitg. Mintgin duei far aschi bien e prender buns calzers, vons ed uaffens adattai per la lavur sin differentas via d’uaul. Suenter la lavur offerescha l’uniun ina grillada communabla.
Sin bien seveser, SumvitgViva
ils 6 da mars 2022
Guida atras Sumvitg
ils 15 da fevrer 2022
Invitaziun alla 2. radunonza generala da SumvitgViva
Datum e temps:
Sonda, ils 5 da mars 2022 allas 20.15 uras
Liug da radunonza:
aula casa da scola Sumvitg
Occurenza preliminara:
Allas 19.00 uras sentupein nus sin plaz Cadruvi. Ei ha liug ina guida atras nies vitg cun entginas surpresas
Tractandas
- Avertura e beinvegni
- Elecziun d’in dumbravuschs
- Approbaziun dil protocol dalla radunonza generala dils 27-04-2019
- Rendaquen 2019, 2020 e 2021
- Rapport dil president
- Elecziuns communalas 2022, nominaziuns
- Elecziuns dalla suprastonza, dil president e dil post da revisiun
- Program da lavur 2022
- Orientaziuns e varia
Cordialmein envida la suprastonza
ils 16 da december 2021
In bi e ruasseivel temps d’advent
Nus giavischein a vus in bi temps d’advent, bialas fiastas da Nadal ed ina buna ruschnada egl onn 2022!
In grond engraziel fetg a vus tuts per vies sustegn, seigi quei moralmein, finanzialmein ni cun lavur. Nus selegrein sigl onn proxim plein projects e muments da cuminonza.
E buc emblidar: ils 5 da mars 2022 ha la radunonza generala da SumvitgViva liug. Segir puspei cun ina u l’autra supresa. Dapli detagls suondan.
ils 12 da december 2021
Sera d’Advent 2021
Ier sera havein nus saviu sentupar sil plaz Cadruvi e celebrar suenter in liung temps senza occurenzas la cuminonza. Ei ha fatg grond plascher da veser aschi biaras convischinas e convischins. Nus havein saviu dar ina paterlada e star in mument ensemen. Engraziel fetg per vossa viseta!
Era uonn havein nus puspei piclau ora enzatgi che ha zun spezials merets da retscheiver nossa «Steila da Sumvitg».
La Steila da Sumvitg 2021 va a nossa stizun dil vitg. Denton fuss quella stizun nuot sch’ella havess buca in cor. Ed il cor da quella stizun ein nossas mattas dil Volg, ch’ein di per di cheu per nus e miran che nus hagien nies da mintgadi. Nus engraziein a vus, Adelina, Assunta, Renata e Sandra per vies engaschi cun tonta carezia per nossa cuminonza.
Maletgs da quella sera anfleis vus cheu.
ils 25 da november 2021
Sera d’Advent 2021
Sco usitau organisescha l’uniun SumvitgViva era uonn la sera d’advent. Secapescha vegn la «Steila da Sumvitg 2021» puspei surdada quella sera sco grond dieuspaghi ad ina persuna per ses buns survetschs en favur dalla cuminonza.
Sonda, ils 11 da december 2021 allas 18.00 uras sin plaz Cadruvi a Sumvitg.
Sin seveser e cordials salids, uniun SumvitgViva
ils 20 da november 2020
Sera d’Advent 2020
Preziadas convischinas e preziai convischins
Muort las restricziuns en connex cun il virus da corona vegn ei a dar uonn negina sera d’advent a Sumvitg. Era nossa «Steila da Sumvitg» vegn buca surdada uonn e resta aschia in ulteriur onn tier la Societad da musica Sumvitg/Cumpadials.
Nus giavischein a vus tuts ina buna ruschnada egl onn 2021 e surtut buna sanadad!
Uniun SumvitgViva
ils 30 da november 2019
Sera d’Advent 2019
Malgrad ferdaglia e neiv ha era nossa secunda sera d’Advent a Sumvitg sin plaz Cadruvi giu grond success. Fetg bia convischins e biaras convischinas han dau suatientscha a noss’invitaziun ed han gudiu cun nus ina biala sera d’advent. In grond engraziel fetg a tut quels che han gidau nus sin ina u l’autra moda per il beingartegiar da quell’occurenza. Maletgs ed impressiuns anfleis vus cheu.
ils 20 da november 2019
«Steila da Sumvitg» 2019
Tgi daventa uonn nossa «Steila da Sumvitg»?
A caschun dalla sera d’advent da SumvitgViva vegn ella era uonn puspei surdada ad enzatgi per lur buns survetschs en favur da nossa cuminonza.
Sera d’advent, venderdis ils 29 da november 2019, allas 19.30 uras sin Plaz Cadruvi
ils 12 da november 2019
2. Sera d’advent a Sumvitg
Ils davos decennis procurava il vischinadi mintgamai ch’il plaz Cadruvi vegni ornaus duront il temps d’advent cun in pigniel da Nadal illuminaus. SumvitgViva ha surpriu igl onn vargau quell’incarica, ch’il vischinadi abolius exequeva. Il comité d’iniziativa cumpletta quella incarica cun ina sentupada denter vischins e hosps ed enramar quella cun producziuns da nossas uniuns culturalas.
Nus selegrein sin in e scadin che less entscheiver cun nus il temps d’advent ed envidein en venderdis, ils 29 da november 2019 pign e grond ad in pign program da divertiment, punsch, vin cauld e piziulta. Secapescha vegn era puspei la «Steila da Sumvitg» surdada quella sera.
ils 23 d’october 2019
Viver ella scola da Sumvitg
RTR Radiotelevisiun Svizra Rumantscha ha fatg ina viseta als emprems locataris dallas habitaziuns che han saviu vegnir realisadas cun il project habitar@giuven. El discuors cun RTR raquentan els co els han che plai e co igl ei da viver ella casa da scola anteriura a Sumvitg.
ils 2 d’october 2019
2. Sera d’advent a Sumvitg
Sco gia igl onn vargau organisescha l’uniun SumvitgViva era uonn la sera d’advent. Secapescha vegn la «Steila da Sumvitg 2019» puspei surdada quella sera sco grond dieuspaghi ad ina persuna per ses buns survetschs en favur dalla cuminonza. Reservei gia uss il venderdis, ils 29 da november 2019. Dapli informaziuns suondan.
ils 15 da settember 2019
Lavur cumina 2019
Sonda, ils 14 da settember 2019 han entgins déls dall’uniun SumvitgViva fatg lavur cumina. Fotis da nossa lavur anflas ti cheu.
ils 12 d’uost 2019
Lavur cumina 2019
Sco informau alla radunonza generala la primavera fagein nus lavur cumina sonda, ils 14 da settember 2019 a Sumvitg. Nus sentupein allas 8:15 uras sin Plaz Cadruvi.
Suenter la lavur – entuorn miezdi – offerescha l’uniun SumvitgViva ina grillada communabla. Mintgin duess far aschi bien e prender cun buns calzers, vons ed uaffens adattai per la lavur sin differentas vias d’uaul.
Secapescha ei in e scadin, era tals ch’ein buca commembers, cordialmein beinvegni tier quella occasiun.
ils 4 d’avrel 2019
Invitaziun alla 1. radunonza generala da SumvitgViva
Nus envidein cordialmein Vus alla radunonza generala da SumvitgViva che ha liug sonda, ils 27 d‘avrel 2019 allas 20.00 uras ell‘aula dalla casa da scola a Sumvitg.
Tractandas
1. Avertura e beinvegni
2. Elecziun d’in dumbravuschs
3. Approbaziun dil protocol dalla radunonza da fundaziun dils 07-09-2018
4. Rendaquen 2018
5. Program da lavur
6. Iniziativa promoziun dalla construcziun da habitadis
7. Presentaziun da Flurina Cahannes, nova proprietaria dall’ustria Lechmann
8. Orientaziuns e varia
Cordialmein envida
La suprastonza da SumvitgViva
ils 15 da mars 2019
Propostas per elecziuns communalas 2019–2021
La suprastonza da SumvitgViva ei s’occupada en sia davosa seduta cun la damonda da nominaziuns e propostas per las proximas elecziuns communalas. Demai ch’ils mandataris dalla executiva communala stattan vinavon a disposiziun havein desistiu da clamar ina radunonza extraordinaria.
Sin nossa gliesta figureschan ils suandonts dus mandataris veders, che stattan vinavon a disposiziun:
en suprastonza communala: Giusep Bearth, Sumvitg, gerau, veder
en la cumissiun da baghegiar: Erwin Monn, Sumvitg, commember, veder
Ultra da quei essan ira alla tscherca da candidats per posts libers. Varga 50 commembers ni simpatisants da SumvitgViva portan las suandontas duas candidatas novas per mauns dallas elecziuns communalas 2019-2021:
En la cumissiun da quen e gestiun:
Rafaela Degonda, 1990, Sumvitg, referendaria da fiduziari /administratura d’immobilias
En la cumissiun da baghegiar:
Sonia Monique J. Veckmans, 1972, Sumvitg, planisadra da spazzi
La gliesta da propostas cun ils quater candidats vegn surdada alla vischnaunca. Cordiala engraziament als nominai per lur promptadad da s’engaschar en favur dalla publicitad.
ils 22 da fevrer 2019
Radunonza generala SumvitgViva
La radunonza generala dall’uniun SumvitgViva ha liug sonda, ils 27 d’avrel 2019 en casa da scola a Sumvitg allas 20.00 uras. Dapli informaziuns suondan.
ils 5 da fevrer 2019
habitar@giuven
Las lavurs da construcziun en casa da scola Sumvitg per il project habitar@giuven han gia entschiet avon ca. in meins. Quei project vul far ord las anteriuras stanzas da scola a Sumvitg habitaziuns per giuventetgna ed ei in segn per frenar la depopulaziun dalla vischnanca empauet.
Ils emprems locataris pon habitar naven dil fenadur 2019 en scola da Sumvitg.
ils 23 da december 2018
Bialas fiastas da Nadal!
Per las fiastas da Nadal giavischein nus a vus tuts in ruasseivel e bi temps! Nus selegrein gia ussa sin ils projects novs egl onn niev ensemen cun vus.
ils 17 da december 2018
Decisiuns da vischnaunca
habitar@giuven
La radunonza communala dils 14 da december 2018 ha approbau il project habitar@giuven.
Quel vul far ord las anteriuras stanzas da scola a Sumvitg habitaziuns per giuventetgna. Ils vischins da Sumvitg han decidiu claramein da dar il credit da 670’000 francs persuenter. Quei project ei in segn per frenar la depopulaziun dalla vischnanca empauet.
Planisadas ein treis habitaziuns, ina da 3 ½ e duas da 2 ½ stanzas, en las stanzas da scola. Las habitaziuns dueien vegnir mobiliadas per gronda part.
Las treis habitaziuns ein gia reservadas cun precontracts. Las lavurs da construcziun entscheivan el decuors dil meins da schaner 2019 e dueien esser terminadas la fin da zercladur digl onn che vegn, aschia ch’ils emprems locataris pon habitar naven dil fenadur 2019 en scola da Sumvitg.
Engraziel fetg a tut tgi che ha procurau per quella decisiun positiva.
Cuschina nova en scola a Sumvitg
Medemamein ha la radunonza da vischnaunca dils 14 da december 2018 concediu sin damonda da pliras uniuns da Sumvitg e Cumpadials in credit da 44‘000 francs per sanar la cuschina en scola a Sumvitg.
Quella serva ad uniuns ed organisaziuns per lur arranschaments. La cuschina existenta ei vegnida empau els onns e corrispunda buca pli als basegns dil temps.
Cordial engraziament alla vischnaunca per quella decisiun positiva.
ils 11 da december 2018
Radunonza communala Sumvitg
La proxima radunonza communala ha liug venderdis, ils 14 da december 2018 allas 20.00 uras a Sumvitg.
A quella caschun vegnan dus projects che SumvitgViva sustegn tractai, numnadamein:
– la sanaziun dalla cuschina en casa da scola a Sumvitg
– il project habitar@giuven (construcziun da habitaziuns per giuventetgna en scola a Sumvitg).
Ei fuss bi d’astgar beneventar vus cun dretg da vuschar en vischnaunca tier quella radunonza.
Cun forza unida savein nus contonscher massa!
ils 1 da december 2018
Sera d’Advent a Sumvitg
Noss’emprema sera d’Advent a Sumvitg sin plaz Cadruvi ha giu grond success. Fetg bia convischins e biaras convischinas han dau suatientscha a noss’invitaziun ed han gudiu cun nus ina biala sera d’Advent. In grond engraziel fetg a tut quels che han gidau nus sin ina u l’autra moda per il beingartegiar da quell’occurenza. Maletgs ed impressiuns anfleis vus cheu.
ils 31 d’october 2018
Sera d’Advent a Sumvitg
Nus selegrein sin in e scadin che less entscheiver cun nus il temps d’Advent ed envidein en ils 30 da november 2018 pign e grond ad in pign program da divertiment, punsch, vin cauld e piziulta. Dapli informaziuns cheu.
ils 5 d’october 2018
100 commembers per SumvitgViva
SumvitgViva ha astgau beneventar siu 100avel commember.
Roger Arpagaus da Sumvitg ha perquei astgau prender encunter in pign present. Cheu sas era Ti daventar commembra ni commember dall’uniun SumvitgViva.